Mae Prifysgol Glyndŵr ar restr fer Gwobrau Addysg Uwch The Times 2008 am Gefnogaeth Ragorol i Fyfyrwyr Anabl

Mae prifysgol fwyaf newydd Cymru ar y rhestr fer am wobr genedlaethol mewn cydnabyddiaeth o’i gwaith gyda myfyrwyr anabl. 

Mae Prifysgol Glyndŵr yn un o chwe phrifysgol sydd ar y rhestr fer am y wobr am Gefnogaeth Ragorol i Fyfyrwyr Anabl yng Ngwobrau Addysg Uwch The Times 2008. 

Mae Gareth Stafford yn un o nifer o fyfyrwyr anabl sy’n astudio yn y brifysgol, ble mae 14.1 y cant o’r myfyrwyr – y canran uchaf yng Nghymru – yn hawlio LMA (Lwfans Myfyrwyr Anabl).*

Fe gwblhaodd y gŵr 22ain oed, sy’n dioddef o barlys yr ymennydd, radd sylfaen mewn Technoleg Stiwdio Sain gan ddefnyddio technoleg newydd a ddatblygwyd gan yr Ysgol Gyfrifiadura a Thechnoleg Cyfathrebu. Defnyddiwyd ei achos ef fel enghraifft gan y Brifysgol yn ei chais gwreiddiol am y wobr. 

Meddai Gareth: “Fe wnes i fwynhau’r cwrs yn arw ac roedd y gefnogaeth gan y staff i gyd yn anhygoel. Cafodd y cwrs ei addasu ar gyfer fy anghenion a darparwyd ffyrdd eraill o asesu ble’r oedd angen.”

Mae Gareth hefyd ar ei ffordd i gyflawni ei freuddwyd o ennill medal yng Ngêmau Paralympaidd 2012. Mae Gareth ar hyn o bryd yn chwaraewr rhyngwladol dros Gymru yn ngêm paralympaidd Boccia, math o fowls ar gyfer pobl anabl. Gareth yw’r unig aelod o sgwad Boccia Cymru sy’n dod o Ogledd Cymru.

Dyfarnwyd Ysgoloriaeth Chwaraeon Prifysgol Glyndŵr iddo ddwywaith am ei gampau. Mae hyn yn cefnogi datblygiad chwaraeon yr athletwyr gorau sy’n astudio yn y brifysgol.   

Mae Gareth yn awr yn cymryd blwyddyn allan i fynd ar drywydd ei freuddwyd. Meddai: “Rydw i’n gobeithio defnyddio’r amser i gefnogi pobl anabl eraill sy’n chwarae Boccia ac rydw i hefyd yn mynd i wneud cwrs hyfforddi.” 

Ychwanegodd yr Athro Michael Scott, Is-Ganghellor Prifysgol Glyndŵr: “Mae cael eich rhoi ar y rhestr fer am y wobr am Gefnogaeth Ragorol i Fyfyrwyr Anabl yn anrhydedd ac yr ydym yn falch o gael ein cydnabod am yr ymdrechion yr ydym yn eu gwneud er mwyn gwneud i’n myfyrwyr deimlo’n gartrefol a chreu awyrgylch y byddant yn ei gofio am flynyddoedd i ddod.”  

Mae’r Gwobrau yn cael eu rhedeg gan The Times ac maent yn eu pedwerydd blwyddyn erbyn hyn. Maent yn anelu i gydnabod y gwaith arloesol sy’n cael ei wneud gan sefydliadau addysg uwch yn y DU. Mae’r categorïau yn cynnwys Profiad Myfyrwyr Gorau, Prifysgol y Flwyddyn, Pecyn Cefnogaeth Ariannol Rhagorol i Fyfyrwyr, Cyfraniad Rhagorol i’r Gymuned Leol, Menter Farchnata’r Flwyddyn a Chefnogaeth Ragorol i Fyfyrwyr Anabl.
 
Meddai Ann Mroz, Golygydd y Times Higher Education: “Mae’r gwobrau yn cydnabod y goreuon mewn addysg uwch yn y DU ac mae’n bleser gennym gyhoeddi fod Prifysgol Glyndŵr ar restr fer y wobr am Gefnogaeth Ragorol i Fyfyrwyr Anabl. Mae ein huwch banel ymgynghorol wedi cael eu cdethol o bob maes o’r byd academaidd ac roedd yn rhaid iddynt ddewis o blith cannoedd o geisiadau o’r safon uchaf – dim ond y goreuon aeth trwodd i’n rhestr fer.” 
 
Bydd yr enillwyr yn cael eu cyhoeddi yn y seremoni wobrwyo yng Ngwesty’r Grosvenor House, Park Lane, Llundain, ar ddydd Iau 23 Hydref 2008. Y llynedd daeth dros 1,200 o bobl o bob rhan o addysg uwch at ei gilydd i ddathlu campau’r sector.

I archebu bwrdd, cysylltwch â Maria Myers ar rif ffôn:01252781178, ebost: maria@creativeevents.co.uk  neu larlwythwch ffurflen gais o www.timeshighereducation.co.uk/awards 

*Dangosyddion Perfformiad AYAU, Mehefin 2008