Text begins here:
Deunyddiau Cyfansawdd
MSc Deunyddiau Cyfansawdd
MRes Deunyddiau Cyfansawdd
Yn hanesyddol, mae adenydd awyrennau wedi’u gwneud o aloi alwminiwm. Erbyn hyn mae yna chwyldro yn y defnydd o ddeunyddiau, a bellach mae deunyddiau cyfansawdd (composites) yn cael eu defnyddio’n eang yn y diwydiant oherwydd fod y strwythurau yn pwyso’n llai ac felly yn arwain at gostau rhedeg is.
Mae'r cyrsiau hyn yn sôn am theori mecanwaith deunyddiau cyfansawdd, ystyriaethau dylunio ac agweddau amgylcheddol yn ymwneud â hwy. Y nod yw darparu dealltwriaeth crud-i-bedd o'r deunyddiau hyn. Cynlluniwyd y cyrsiau hyn mewn cydweithrediad agos ag Airbus UK er mwyn bod yn gyflwyniad, wedi’i arwain gan y diwydiant, i gyfansoddion a’u defnydd mewn awyrennau a diwydiannau eraill.
Maent yn rhoi’r ddealltwriaeth gefndir i’r materion y tu ôl i'r defnydd o ddeunyddiau cyfansawdd mewn strwythurau awyrennau a chymwysiadau trafnidiaeth eraill. Mae’r cyrsiau hefyd yn cyflwyno gweithgynhyrchu manylion a chydosodiadau deunyddiau cyfansawdd, mecanwaith deunyddiau cyfansawdd a sut y maent yn wahanol i ddeunyddiau isotropig.
Mae'r MSc yn gwrs trosi i'r rheiny sydd â chefndir mewn strwythurau metelig, yn ogystal â bod yn gyflwyniad cynhwysfawr i ddeunyddiau cyfansawdd a’u defnydd mewn diwydiant.
Mae'r cwrs MRes yn radd Meistr sy’n seiliedig ar ymchwil, ac mae ar gyfer pobl sydd eisoes â gradd gyntaf neu radd drosi Meistr mewn pwnc perthnasol ac sy’n dymuno archwilio a datblygu eu potensial eu hunain trwy wneud gwaith ymchwil ar lefel ôl-raddedig.
Prif ffeithiau
- Mae’r Brifysgol wrthi’n ceisio cael achrediad ar gyfer y cyrsiau hyn gan y Sefydliad Peirianneg a Thechnoleg (IET)
- Cyfleusterau darlithio, ymchwilio a TG ardderchog ar gael oherwydd fod y Brifysgol yn cydweithio ag Airbus UK yn y cyfleuster ar y cyd ganddynt, sef y Ganolfan Datblygu a Hyfforddi Deunyddiau Cyfansawdd Uwch
- Mae gan y Brifysgol brofiad helaeth o brosesu cyflym ar ddeunydd polymer cyfansawdd tu allan i ffwrn aerglos drwy ddefnyddio amrywiaeth o dechnegau, gan gynnwys prosesu microdon, sefydlu a Quickstep (trosglwyddo gwres hylif).
Mae gennym hefyd arbenigedd mewn cemeg resin ac amrywiaeth eang o fathau o resin
- Bydd gan y labordy gyfleusterau ar gyfer dadansoddi thermol ar ddeunydd cyfansawdd ac yn gallu gweithgynhyrchu cydrannau bach o ffibrau wedi’u trwytho’n barod yn ogystal â ffibrau sych
- Gellir cysylltu ymchwil yn y maes hwn â gwaith ymchwil presennol ym meysydd deinameg hylif cyfrifyddol, peirianneg awyrennau a pheirianneg ceir rasio
- Gan fod peth o ymchwil cyfansoddiadau yn cynnwys modelu gwres drwy ddefnyddio tonnau electromagnetig, mae hyn yn cysylltu ag ymchwil mewn peirianneg cyfrifiadura a thrydanol
Cynnwys y cwrs
MSc Deunyddiau Cyfansawdd
- Cyflwyniad i ddeunyddiau cyfansawdd, i’w cynhyrchu a’u nodweddion – sôn yn gyffredinol am y galw sydd wedi dod o’r diwydiant awyrofod ar gyfer deunyddiau cyfansawdd, gan gynnwys y math o ddeunydd cyfansawdd sydd ar gael a’u cyfansoddion. Fel rhan o'r modiwl hwn byddwch yn astudio’r ystyriaethau y tu ôl i ddewis y deunydd cyfansawdd cywir ar gyfer cymhwysiad, dulliau cynhyrchu a ddefnyddir yn gyffredin ar gyfer gwneud deunyddiau cyfansawdd a hanfodion mecanwaith deunydd cyfansawdd
- Cydosod, uno ac atgyweirio deunydd cyfansawdd - archwilio offer a thechnegau cydosod ac asio deunydd cyfansawdd, ac mae hyn yn cynnwys drilio, tocio, shimio, selio a chlymu. Byddwch yn adolygu sut y mae hyn yn wahanol i fetelau a chewch eich cyflwyno i'r dulliau a ddefnyddir i atgyweirio. Bydd y modiwl hwn hefyd yn trafod effaith deunydd cyfansawdd, yn enwedig mewn gwrthdrawiad, ac yn adolygu’r dulliau a ddefnyddir ar gyfer sicrwydd ansawdd
- Dylunio gyda deunyddiau cyfansawdd - theori - mae hwn yn sôn am fecaneg fanwl a’r defnydd o ddeunydd cyfansawdd a theori glasurol lamineiddio, gan gynnwys theori sylfaenol deunydd cyfansawdd ar gyfer cyfansoddion matrics hydwyth a brau.
Bydd yn edrych hefyd ar theori dadansoddi ar gyfer effaith cyfaint ffracsiwn, methiant deunydd cyfansawdd ac effaith ongl y llwytho yn ogystal â’r prif feini prawf methu
- Dylunio gyda deunyddiau cyfansawdd - ymarferol - byddwch yn ymwneud â mecaneg fanwl deunydd cyfansawdd a theori glasurol lamineiddio, yn ogystal â chael y cyfle i gymhwyso egwyddorion i ddewis a dylunio laminiad(au) penodol.
O'r modiwl hwn, byddwch yn dod i ddeall yn fanwl y gofynion posibl y mae mellt yn eu hachosi i awyren a'i strwythur cyfansawdd. Byddwch hefyd yn defnyddio dulliau rheoli modern i reoli deunyddiau cyfansawdd
- Dadansoddi, profi a sicrhau ansawdd deunyddiau cyfansawdd – bydd y modiwl hwn yn archwilio nodweddion mecanyddol deunyddiau cyfansawdd ac yn esbonio eu cyfyngiadau
Bydd hefyd yn cyflwyno dulliau dadansoddi thermol a ddefnyddir wrth ddadansoddi deunyddiau cyfansawdd
- Agweddau amgylcheddol yn ymwneud â deunyddiau cyfansawdd – byddwch yn deall effeithiau amodau amgylcheddol ar fywyd deunydd cyfansawdd; effaith tân arnynt; effaith mellt ar ddeunyddiau a strwythurau. Byddwch hefyd yn dysgu am ailgylchu a dulliau rheoli diwedd oes deunyddiau cyfansawdd yn ogystal â dod i ddeall oblygiadau cyfreithiol a materion iechyd a diogelwch
- Traethawd Estynedig/Prosiect
MRes Deunyddiau Cyfansawdd
Byddwch yn astudio sawl dewis o’r modiwlau a restrir ar gyfer y cwrs MSc, ynghyd â'ch prosiect ymchwil helaeth eich hun.
Gofynion mynediad
Caiff y cwrs hwn ei ddysgu mewn blociau wedi’ch rhyddhau o’ch gwaith cyflogedig, felly dylech eisoes fod wedi’ch cyflogi mewn sector cysylltiedig a bod â gwybodaeth weithredol am ddeunyddiau cyfansawdd.
Cyfleoedd Gyrfa
Bydd yr arbenigedd a enillwch o’r rhaglenni yn eich rhoi ar flaen y gad ym maes datblygu awyrennau, yn ogystal â diwydiannau cysylltiedig lle mae'r prosesau a deunyddiau newydd yn hanfodol i ddyfodol y diwydiant. Gallai cwblhau'r cwrs MRes arwain at yrfa mewn gwaith ymchwil lle gallech barhau â’ch diddordeb ymchwil ac arwain arloesedd.
|
Am fwy o wybodaeth
am ein cyrsiau
ffoniwch
01978 293439
neu ebostiwch
SID@glyndwr.ac.uk
|
