Technoleg Dylunio Pensaernïol

BSc (Anrh) Technoleg Dylunio Pensaernïol

Cyflwyniad

Ydych chi’n arloesol, yn broffesiynol ac yn greadigol? Ydych chi'n dechnolegydd dylunio pensaernïol ar gyfer y dyfodol?

Mae’r radd hon wedi’i chynllunio i gefnogi eich datblygiad chi i fod yn ased amhrisiadwy i gyflogwyr yn y diwydiant adeiladu. Mae'r cwrs wedi ei gynllunio i ysgogi eich dealltwriaeth a’ch ymwybyddiaeth feirniadol o sut y gall Technoleg Dylunio Pensaernïol ddylanwadu ar yr amgylchedd adeiledig ac ar gymdeithas.

Daw’r myfyrwyr sydd ar y cwrs hwn o amrywiaeth o gefndiroedd, gan gynnwys y rheiny sy'n dymuno dilyn gyrfaoedd mewn Technoleg Dylunio Pensaernïol neu alwedigaethau cysylltiedig a phobl broffesiynol sydd wrthi’n cryfhau eu gyrfaoedd.

Ffeithiau allweddol

Amgylchedd dysgu cyfeillgar a chefnogol
Mae grwpiau tiwtorial bychan eu maint yn golygu fod myfyrwyr yn cael lefel uchel o gefnogaeth a sylw gan diwtoriaid a threfniadau dilyniant hyblyg wrth astudio
Enw da rhagorol o ran cyflogadwyedd
Mae’r cwrs wedi’i achredu’n llawn gan Sefydliad Siartredig Technolegwyr Pensaernïol (CIAT), Sefydliad Siartredig Adeiladu (CIOB) a Chymdeithas y Peirianwyr Adeiladu (ABE). Mae’n darparu mynediad i gymwysterau trosglwyddadwy yn Ewrop a Statws Siartredig yn y Deyrnas Unedig
Mynediad uwch i’r rheiny sydd â chymwysterau proffesiynol neu academaidd perthnasol
Ceir pwyslais ar dasgau ymarferol wrth asesu, gyda dilyniant hyblyg, a modd addasu ar gyfer myfyrwyr rhan-amser a phrofiad gwaith

Cynnwys y cwrs

Mae'r cwrs wedi ei drefnu ar sail modiwlau dylunio sy’n mynd yn fwyfwy cymhleth: o raddfa cartref i faint tref, a’r gwaith yn cael ei wneud yn unigol ac mewn grwpiau. Cewch eich annog i feddwl yn annibynnol, yn feirniadol ac yn rhesymegol er mwyn cyfathrebu atebion dylunio priodol yn llwyddiannus. Nod y cwrs yw ysbrydoli proffesiynoldeb, dawn dylunio a gwreiddioldeb.

Byddwch yn astudio:

materion hanfodol yn ymwneud â’r amgylchedd a chynaliadwyedd
rôl gwasanaethau mecanyddol a thrydanol mewn adeiladau cymhleth
dylunio pensaernïol, a meithrin sgiliau ymarferol o ran cyflwyno – o gwneud modelau i ddylunio gyda chymorth cyfrifiadur
cadwraeth adeiladau, a gwleidyddiaeth pensaernïaeth
rheoliadau a rheoli adeiladu, cyfraith iechyd a diogelwch, gwerthuso adeiladau a dulliau adeiladu modern

Cyfleoedd gyrfaol

Daw’r rhan fwyaf o’n graddedigion o hyd i waith yn y diwydiant adeiladu a datblygu, sef un o sectorau mwyaf yr economi. Mae cyrchfannau graddedigion yn gallu cynnwys practis pensaernïol, cyrff contractio adeiladu sydd â gwasanaethau dylunio mewnol, adrannau datblygu ac eiddo awdurdodau lleol, ac adrannau rheoli cyfleusterau ystadau presennol

Cyflogadwyedd

Mae Prifysgol Glyndŵr wedi'i ymrwymo i sicrhau bod ein graddedigion i gyd wedi'u cyfarparu'n dda ar gyfer y byd gwaith. Cliciwch yma i ddarllen mwy am lwyddiant ein cefnogaeth cyflogadwyedd.

Asesu

Mae dulliau asesu amrywiol yn cynnwys aseiniadau ar ffurf traethodau ac adroddiadau, ac arholiadau llyfr agored seiliedig ar senario ar ffurf ‘asesu o fewn y cwrs’ rheoledig. Mae’r modd o asesu’r modiwlau dylunio yn galw am gynhyrchu brasluniau datblygiadol a lluniadau gorffenedig ar ffurfiau CAD traddodiadol a chyfredol, cyflwyniadau mewn seminarau a thiwtorialau, gwneud modelau a fideos.