Datblygu Gêmau Cyfrifiadurol

Nid yn unig y mae Gêmau Cyfrifiadurol yn un o’r diwydiannau sy’n tyfu gyflymaf yn y sector technoleg ddigidol, y mae hefyd yn eithriadol o amrywiol o ran llwybrau gyrfaol posibl. Os oes gennych ddiddordeb mewn gêmau cyfrifiadurol ac yr hoffech ymwneud â dylunio a chynhyrchu teitlau a thechnolegau gêmau’r dyfodol, yna mae’r cwrs hwn yn ddewis delfrydol i chi. Byddwch yn datblygu sgiliau dylunio a datblygu cryf ac yn dysgu sut i ymwneud ag arferion a methodolegau diwydiant gêmau go iawn.

Byddwch yn datblygu sgiliau cryf mewn datblygu naratif a chymeriadau gêmau, gan gynnwys dylunio a chynhyrchu asedau 3D fel modelau amgylcheddol a chymeriadau. Byddwch yn dysgu sut i ddatblygu naratifau a chymeriadau cryf i’r gêmau, yn dylunio ac yn animeiddio modelau 3D, yn defnyddio technolegau sain i ddod â’ch gêmau yn fyw ac yn dyfeisio cymwysiadau symudol a senarios ar gyfer nifer o chwaraewyr.

Byddwch hefyd yn dysgu sut i gymhwyso eich sgiliau i gynhyrchu ystod o gynnyrch digidol tu allan i’r diwydiant gêmau, gan roi sgiliau trosglwyddadwy i chi weithio mewn meysydd eraill yn y cyfryngau digidol a chreadigol yn ogystal â’r sgiliau a’r wybodaeth angenrheidiol i ddilyn gyrfa yn y diwydiant gêmau.

Mae’r cwrs wedi’i gynllunio gyda chyflogadwyedd mewn golwg. I’r diben hwnnw, cewch eich addysgu i ddatblygu portffolio eang o waith personol a fydd yn eich helpu i addasu orau ar gyfer yr yrfa sydd gennuch mewn golwg. 

Ffeithiau allweddol

• Stiwdio arbenigol i ddatblygu gêmau cyfrifiadurol sydd yn bwrpasol ar gyfer dylunio a chynhyrchu rhaglenni’r cyfryngau digidol a chymwysiadau datblygu gêmau
• Mynediad i Adeilad Diwydiannau Creadigol o’r radd flaenaf newydd Prifysgol Glyndŵr a’i gyfleusterau wedi’u hachredu gan Apple, stiwdios cynhyrchu teledu a chyfryngau creadigol llwyr integredig
• Mynediad i’r rhyngrwyd a chyfleusterau cyfrifiadurol rhwydweithiol ledled y campws
• Mynediad i’n hystafell broffesiynol ôl-gynhyrchu sain ac i’n gorsaf radio
• Cewch ddefnyddio technolegau caledwedd a meddalwedd amrywiol sy’n ymwneud â rhyngweithio pobl â chyfrifiaduron a gallwch ddatblygu rhyngwynebau deallus ar gyfer gêmau gyda phwyslais arbennig ar gynnyrch i bobl gydag anableddau corfforol neu anawsterau dysgu
• Mae’r cwrs hwn wedi ei gynllunio i’ch darparu gyda’r sgiliau a gwybodaeth sydd eu hangen arnoch ar gyfer gwaith cyflogedig yn y diwydiannau cyfryngau digidol a datblygu gêmau
• Mae Cynllunio Datblygiad Personol wedi’i integreiddio trwy gydol y cwrs er mwyn datblygu’r fframwaith sgiliau angenrheidiol ar gyfer rheoli effeithiol yn bersonol, yn academaidd ac o ran gyrfa

Cynnwys y cwrs

BSc (Anrh) Datblygu Gêmau Cyfrifiadurol

Wrth wraidd y cwrs hwn mae egwyddorion datblygu technegol a dylunio. Yn eich blwyddyn gyntaf fe’ch cyflwynir i hanfodion rhaglennu cyfrifiadurol, sain ddigidol, rendro graffigol a’r modd y mae technoleg meddalwedd a chaledwedd gêmau blaengar yn gweithio. Yn ogystal, ceir elfen gref o ddylunio a chynhyrchu creadigol ble byddwch yn ymwneud â meddalwedd a chaledwedd safon diwydiant er mwyn datblygu syniadau a chysyniadau fel aelod o dîm ac fel unigolyn.

Yn nes ymlaen yn y cwrs, cewch gyfle i weithio gydag offer safon diwydiant er mwyn datblygu eich naratifau, cymeriadau a senarios gêmau eich hun. Wrth i’r cwrs fynd rhagddo byddwch yn ehangu eich gwybodaeth am raglennu ac yn mynd ati i weithio gydag aml-lwyfannau fel smartffônau a dyfeisiau symudol. Yn ogystal, byddwch yn cwmpasu prif feysydd fel datblygu gêmau ar gyfer nifer o chwaraewyr, dylunio systemau DA a modelu ac animeiddio 3D uwch ar gyfer gêmau. 

Byddwch yn datblygu sgiliau fydd yn amhrisiadwy mewn unrhyw amgylchedd gwaith neu fusnes yn y dyfodol, gan gynnwys hunanysgogiad, rheoli amser, datrys problemau a chymhwyso methodolegau rheoli, datblygiad personol a myfyrdod beirniadol. Yn ogystal, datblygir sgiliau beirniadol eraill gan gynnwys ymchwil, dadansoddi a chyflwyno wrth i chi ehangu eich gwybodaeth am feddalwedd arbenigol sy’n berthnasol i ddatblygu gêmau cyfrifiadurol. 

Cynnwys nodweddiadol y cwrs

• modelu ac animeiddio 3D
• naratifau a chymeriadu mewn gêmau
• technoleg sain ar gyfer gêmau
• datblygu gêmau symudol
• dylunio a datblygu gêmau ar gyfer ifer o chwaraewyr

Gweler gwybodaeth am fodiwlau BSc (Anrh) Datblygu Gêmau Cyfrifiadurol

Cyfleoedd gyrfaol

Rhaglennydd gêmau, dylunydd lefel, cynhyrchydd, peiriannydd sain, artist/animeiddiwr technegol gêmau, ymgynghorydd. Bydd y cwrs hwn hefyd yn eich paratoi ar gyfer gyrfaoedd mewn sawl maes cyfrifiadurol prif ffrwd, megis cymorth TG ac ymgynghoriaeth TG, cymwysiadau ar y Rhyngrwyd ac e-fasnach, yn ogystal â meysydd eraill y cyfryngau digidol  

Asesu

Cynlluniwyd yr asesu gyda golwg ar ddatblygu portffolio personol, ar ffurf gwaith cwrs tîm ac unigol gan ddangos cymhwyster wrth gyflenwi prosiectau a gwaith ymarferol. 

Hyd y cwrs

Llawn amser
Tair blynedd

Rhan-amser
Pum mlynedd

Gofynion mynediad a gwneud cais

Y gofynion cyffredinol ar gyfer y radd anrhydedd yw 240 pwynt UCAS yn lefel A neu gyfwerth. Yn ogystal, mae’n rhaid i ymgeiswyr fod wedi pasio pum TGAU gyda graddau A, B neu C gan gynnwys Mathemateg a Saesneg.

Côd UCAS: G451
Dylai ymgeiswyr rhan-amser wneud cais uniongyrchol

O 2012, ein gofynion academaidd cyffredinol ar gyfer gradd anrhydedd fydd 240 pwynt UCAS, a 120 pwynt UCAS ar gyfer gradd sylfaen. Os nad yw’r pwyntiau sydd eu hangen gennych, bydd eich cais yn dal i gael ei ystyried. Rydym yn croesawu ymgeiswyr o gefndiroedd amrywiol a chydag ystod o brofiadau.